Strikkekafe på Garn Senteret
Ein inspirerande og triveleg kveld
Mandag 24.mars tok 25 bygdekvinner turen til Vangsgata og strikkekafe på Garn Senteret. Alle fekk vinnarlodd ved inngangsdøra og fann seg plassar ved langbord og i sofa.
Liv Marion syna og fortalde om ulike modellar, som er båe kjekke å strikka å gå med no fram mot vår og sommar. Her kan ein velgja garn i ulike kvalitetar, som til dømes lin, alpakka og mohair, og me var fleire denne kvelden, som vart freista til å byrja med nytt spøt. Det var og spennande å sjå kva "naboen" spøta på. Strikketeknikkar og gode strikkeråd vart delt over ein låg pinne denne kvelden...
Liv Marion leia utloddinga med raus og stødig hand. Maskemarkørar, hårstrikk, ullsåpa og mykje anna vart delt ut, og det beste var, at me sat med vinnarlodd heile gjengen.
Det er noko med å sitja saman, omringa av mjuke garnnøster i eit hav av fargar, med eit spøt i fanget, kaffi / te i koppen og kake og bollar på bordet - det er oppskrifta på god stemning. Stemninga var so god og drøsen gjekk so ivrig mellom bygdekvinnene at planlagd strikke-quiz vart utsatt til eit anna høve.
Takk til alle som kom på strikkekafe - ekstra stas med nye fjes ! Takk til de som koka kaffi og laga bolle, muffins og kake, og ikkje minst takk til Liv Marion og Garn Senteret for ein triveleg kveld.