Det har vore mykje bær og blomster i hagen i år, dei som har vore med på vatningsplanen har gjort god jobb. Vi fekk også sett opp ein bossdunk, slik at vi kan rydde litt når vi har vatningsveke. Har fungert godt, sjølv om vi gjerne kunne hatt fleire dugnadar for å ta unna skvalderkål og anna ugras.

Vi bestemte haustdugnad til onsdag, 9. oktober kl 11.

Vergudane heldt seg i skinnet ein times tid! Så vi 9 som møtte opp, fekk gjort det meste. Klipte bringebær- og andre bærbusker, rosebusker og gamle stauder, rydda vekk sommarblomster og planta litt haustlyng.

Rydda og vaska også bord og stolar, og Kjellaug og Elinor gjekk laus på spyling og skrubbing av plattingen for å få vekk måseskiten. Paviljongen har blitt vaska av Elinor tidlegare i sommar. Håper noko kan gjerast for å hindre måsereir på taket til neste år, for det har vore plagsomt med måsar og ungar både i paviljongen og på uteplassen ved sjukeheimen. Ikkje kjekt verken for pasientar eller pårørande som vil vere ute. 

Tusen takk til alle som har hjelpt til med vatning og rydding i sommar, takk til Elinor for god eplekake, og til kjøkkenet for kaffi og sjokolade!

Sansehagegruppa består av Judith, Bjørg og Anne frå Vbk, Elinor frå Helselaget, Kjellaug frå Pårørandeforeninga og Lisbeth frå dei tilsette.