I år som tidlegare var årsmøtet i Solheim grendahus. Denne gongen hadde bakegruppa ansvar for dekking av bord og møtemat. Med levande lys og blomar på bordet var det duka for god stemning.

Første økta baud på vanlege årsmøtesaker. Skrivar la stødig fram årsmeldinga, turgruppa tok ordet og kunne melda, på rim, om ekspedisjonar som mana fram turglede hjå dei oppmøtte. Bakegruppa fortalde om bakekurs, dugnadsbaking og grendakafe' - so travelt har året vore for bakegruppa, at dei knapt hugsa alt dei har drive på med.

Kasserar la fram rekneskapen, ryddig som alltid, og rekneskapen vart godkjend. Valnemnda har jobba på denne hausten med å få kabalen på plass, og framlegget vart godt motteke av årsmøtet. 

Den som skal styra skuta no er Elin Koppen, Ingebjørg Winjum er nestleiar, Margareth Sørheim tek over som kasserar, Aud-Marit Netteland er skrivar og har ansvar for heimesida og Anny-Iren Mykkeltveit er styremedlem. Varamedlem er Solvor Tveit Bakketun, Hanne Græsli Grove og Liv Marion Grønås.

Då det formelle var unnagjort, var det tid for betasuppe med nylaga rundstykker & kaffi med heimelaga kaker. Kvelden vart runda av med åresal og fine gevinstar.

Takk for godt oppmøte og ein triveleg kveld i Solheim.