Mykje aktivitet i Hyen Bygdekvinnelag!
Bygdekvinnelaget i Hyen hadde årsmøte i Kleppeneset måndag 27. oktober, og 20 bygdekvinner møtte. Som vanleg var det allsongar, solid kveldsmat og lett underhaldning med song, dikt og utlodning i tillegg til årsmøtesakene. Vi såg attende på mange kjekke og spennande hendingar sidan forrige årsmøte.
1. desember hadde vi medlemstur til julemessa på Tore-garden på Eid. På tross av kraftig regnvêr var det ein koseleg ettermiddag, der vi fekk sjå fint lokalt handtverk og den fine butikken. Vi åt fellesmåltid på kafé i Eid sentrum før vi køyrde heim att. Dagen etter, 2. desember, var styret representerte på julegrantenning med skulen, i skuletida. Representantar frå bygdekvinnelaget hadde sytt for at julegrana var på plass. Torsdag 12. desember spelte spelemannslaget på Løkjatunet og bygdekvinnelaget stilte med kaffi, karamellpudding, vannbakkels og julebrød. Det vart ei triveleg stund for både bebuarar og spelemannslag.
2025 starta vi med medlemsmøte i gamlestova til Judit 30. januar. Vi var mange som var samla til god prat, litt underholdning og god kveldsmat. 12. februar hadde vi hyggjemøte på Løkjatunet, med kaffi og kaker. Anne Marie las frå Ola Mjellem sine forteljingar. Alvhild spelte gitar til songane. Ei triveleg stund for alle. Kompardagen var torsdag 3. april i gymsalen. Det var veldig bra å ha god plass, for arrangementet var godt besøkt. Folk kom frå fjern og nær, og også i år vart det sak i Firda Tidend. Søndag 4. mai var det Blomstermøte i Eimhjella. Kvelden starta kl. 19.30 hjå Kari Eimhjellen, der vi fekk sjå korleis ho dyrka mykje forskjellig i pallekarmar. Etterpå var det samling i Eimhjellen grendehus med kveldsmat, litt program og utlodning. 17. mai gjentok vi suksessen frå forrige år, med festkveld i gymsalen. Programmet hadde blant anna fleire songar av 1.-4. klasse, tale av Magni Aa Berge, og spelemannslaget spelte til dans.
5. juni reiste bygdekvinnelaget på tur med pensjonistlaget. Vi var først til Ullvarefabrikken i Innvik, der vi fekk omvisning og god mat. Turen gjekk vidare til Singerheimen i Olden der vi også vart viste rundt og fekk høyre historia om plassen og folket som hadde budd der. Ein veldig innholdsrik og kjekk tur! Bebuarane på Løkjatunet og andre eldre i bygda var med på tur til Nordfjord Folkemuseum 10. juni for å sjå dei temporære utstillingane «Saman» og «Attåt». Dagen var avslutta med middag på Gloppen Hotell. Turen var sponsa av Aud og Olav Hjortesets alminnelige stiftelse.
I slutten av juli var det klart for ny Friluftshelg, også i år i litt nedskalert versjon. Bygdekvinnelaget var ansvarlig for rømmegraut og kaker på Nesholmen søndag 27. juli, og mange kosa seg her denne strålande sommardagen. På opninga av Hyen skule 21. august hadde Sølvi ei helsing og vi gav ei steiketakke med stativ i gåve. Vi har eit godt samarbeid med Hyen Skule og har i samband med Nøysomprosjektet til Norges Bygdekvinnelag hatt kurs i reparasjon av kle og organisert sykkelstellkurs for skuleelevar.
Styret ordna smørbrød til allmøtet om Midtvegen 615, og 6. september reiste 11 frå laget på Kvinnestreif i Oppstryn. Dette vart ein flott tur, med strålande vêr og mykje interessant å sjå. 28. september hadde vi medlemsmøte på Hopsstøylen, der 18 bygdekvinner møtte. Det var god “søge”, lagssaker og lett program, og det er kjekt å komme saman utan dei store pliktene også. 18. oktober hjelpte bygdekvinnelaget til med å arrangere ei forsinka 50 års-feiring for Hyen spelemannslag med ein jubileumsfest som drog fullt hus og vart stor suksess, med gjester frå fjern og nær. Hilde-Gunn Ommedal heldt hovudtala, Marthe og Fredrik presenterte arkivstoff frå Hyen, og toradartalent Vegard Kvestad spelte både til program og dans. Fire inviterte lag spelte også til dansinga.
Då Beredskapshagen ved Anders og Barbro Nordrum hadde sitt foredrag på Gloppen Folkebibliotek, var vi arrangør saman med Gloppen hagelag, andre bygdekvinnelag i Gloppen og Gloppen Bondelag. Vi bidrog med kake, kaffi, gevinstar og loddsal, og det var over 100 besøkande. Søndag 26. oktober arrangerte vi aktivitetsdag på nyoppussa Høgdene saman med idrettslaget. Klubbhuset er vorte så fint etter mykje dugnad! Her innvigde vi vår nye bålpanne og serverte gratis pølser til alle, i tillegg til gratis kaker, kaffi og frukt. Vi hadde søkt om og fått 10 000 kr til dette i samband med friluftslivets år. Aktivitetane var blant anna natursti, luftgeværskyting, pinnebrød og pilkast. Mange familiar tok turen hit, sjølv om det regna litt. Kakene forsvann og vi måtte hente ny ladning pølser, og det såg ut som om folk kosa seg.
Årets kurs for vaksne har vore takkebakst med natronkaker og fiskebrød, med styret som kursleiarar. Kurset møbeltrekking med Randi Vilnes Honningsvåg på grendahuset i Eimjella hadde mange påmelde. Her måtte vi ha to kurs.
Vedrørande planlagde endringar i eldreomsorga i kommunen var vi representerte i ei arbeidsgruppe saman med pensjonistlaget, utviklingslaget, Br Aa og Hyen Fisk. Gruppa sende eit brev til kommunen, der det vart gitt synspunkt på kva dette ville bety for Hyen. Elles har vi sidan oppstarten av beredskapsplan for Hyen etter Dagmar 2011 vore representerte på årlege beredskapsmøte for heile bygda. Bygdekvinnelaget har også vore representert på fylkesårsmøtet i Sogn og Fjordane bygdekvinnelag, og på regionssamling på Gloppebua. Vi har også fått to nye medlemmer dette året!
Styret etter årsmøtet er leiar Sølvi Espeland Hope, Judit Aa, Liv Holme og Eli Johanne Mjellem. Varamedlemmer er Kirsti Meyer Hope, Aslaug Ommedal og Gerd Lilloe Olsen. Toril Straume og Margaret Aa Djupvik er revisorar, Liv Holme og Alvhild Askeland Holme steller blomster ved kyrkja og Aslaug Larsen, Maria Mjellem og Anne Berit Selle er valnemnd til neste årsmøte.
I det komande året vert det som vanleg kompardag, 17. mai-kveld og Friluftshelg, samt mange andre trivelege aktivitetar. Takk til alle medlemmene som gjer det mogeleg at vi kan bidra til å skape ei levande bygd!