Det var ein interessert gjeng som lytta til slaktaren som nett fekk landbruket i Rogaland sin heiderspris for 2019 - utdelt i Sirdal i Vest-Agder. Stian Espedal delte opp, laga til ulike middagsforslag og fortalde korleis me kunna nytta dei ulike kjøttstykka. Elevane frå 1.-7. klasse var engasjerte, og 6. klasse fekk med seg både fårikålkjøtt, kraftbein og kjøttdeigsingrediensar til bruk i mat & helse-timane framover. Dette lammet var frå Bjerkreim, og har truleg vore på  sommarbeite i Sirdal, så kortreist kan me vel òg kalla det.

Dei andre porsjonspakningane og kjøttstykka vart lodda ut blant bygdekvinner og tilsette på skulen, og nokon hadde lam på menyen same dag, medan andre la gevinsten i fryseboksen til nærare jul. Det vart både lammelår, bog, pinnekjøtt, lammerull til pålegg og middag, karre, skank, sadel og mørbrad og litt til. Og ein handfull avkapp som kan kokast kraft på om ein ikkje vil kasta anna enn eit par kjertlar... Her blir verkeleg heile dyret brukt!

På verdas matvaredag 16. oktober vil 6. klasse ved Sinnes skule og bygdekvinnelaget laga lammegryte med rotgrønsakeretter oppskrift av Harald Osa og dela ut smaksprøvar til medelevar og lærarar.